ໃນວັນທີ 26 ມີນາ 2019, ທີ່ ສະໂມສອນຫ້ອງການ ກະຊວງກະສິກຳ ແລະ ປ່າໄມ້, ໄດ້ມີການຈັດກອງປະຊຸມເປີດການປະຕິບັດງານ (Kick off) ໃນການຕິດຕາມຄວາມຄືບໜ້າຂອງໂຄງການ ຜະລິດກະສິກຳເປັນສິນຄ້າ ຢູ່ ສປປ ລາວ ຄັ້ງທີສອງ. ໃຫ້ກຽດເປັນປະທານຮ່ວມໂດຍ ທ່ານ ສຸລິວົງ ໄຊຍະວົງ, ຮອງຫົວໜ້າກົມແຜນການ ແລະ ການເງິນ ແລະ ທ່ານ Mark Austin, ຫົວໜ້າແຜນງານ ຈາກທະນາຄານໂລກ, ໂດຍມີຜູ້ເຂົ້າຮ່ວມຈາກບັນດາກະຊວງທີ່ເປັນຈຸດປະສານງານ, ທີມງານຈາກທະນາຄານໂລກ ແລະ ຫ້ອງການຄຸ້ມຄອງໂຄງການຂັ້ນສູນກາງ.
ຈຸດປະສົງຫຼັກຂອງກອງປະຊຸມໃນຄັ້ງນີ້ແມ່ນເພື່ອ ປຶກສາຫາລືກ່ຽວກັບ ສະພາບການຈັດຕັ້ງປະຕິບັດໂຄງການໃນໄລຍະປີ 2018, ບັນດາຈຸດີ, ຈຸດອ່ອນ ແລະ ຂໍ້ຄົງຄ້າງ ກິດຈະກຳອົງປະກອບຂອງໂຄງການ ແລະ ການນຳສະເໜີກ່ຽວກັບ ແຜນການລົງເຮັດວຽກຕິດຕາມບັນດາໂຄງການຂັ້ນແຂວງ ໃນລະຫວ່າງວັນທີ 27 ມີນາ ເຖິງ 05 ເມສາ 2019.
ພາຍຫຼັງການ ຈັດຕັ້ງປະຕິບັດໂຄງການດັ່ງກ່າວ ໃນວັນທີ 31 ສິງຫາ 2018 ທາງໂຄງການ ກໍ່ໄດ້ຈັດຕັ້ງປະຕິບັດແຜນກິດຈະກຳ ແລະ ງົບປະມານປະຈຳໄຕມາດ ຂອງ ປີ 2018 ຊື່ງໃນນັ້ນ ແມ່ນໄດ້ມີການຕັ້ງປະຕິບັດກິດຈະກຳໄປຕາມອົງປະກອບຂອງໂຄງການ ເຊັ່ນ: 1) ການປັບປຸງປະສິດທິພາບ ແລະ ຄວາມຍືນຍົງໃນການເຮັດກະສິກຳ, 2) ການເພີ່ມຂີດຄວາມສາມາດທາງການຄ້າຂາຍສິນຄ້າກະສິກຳ, 3) ການຄຸ້ມຄອງໂຄງການ ແລະ 4) ຮັບມືກັບເຫດສຸກເສີນທີ່ອາດຈະເກີດຂຶ້ນ. ກິດຈະກຳສ່ວນໃຫຍ່ແມ່ນ ການລົງສໍາຫຼວດ, ເກັບກໍາຂໍ້ມູນພື້ນຖານ, ປະເມີນຄືນຄວາມເປັນໄປໄດ້ຂອງກຸ່ມເປົ້າໝາຍ ເຊັ່ນ: ກຸ່ມຜະລິດແນວພັນຜັກ, ແນວພັນເຂົ້າ ແລະ ກຸ່ມຜະລິດເຂົ້າ, ພືດຜັກ ແລະ ສາລີເປັນສິນຄ້າ. ພ້ອມດຽວກັນນັ້ນ, ທາງດ້ານວຽກງານການຄຸ້ມຄອງບໍລິຫານໂຄງການເປັນຕົ້ນແມ່ນ ການສ້າງຄວາມອາດສາມາດໃຫ້ແຂວງເປົ້າໝາຍ ກ່ຽວກັບ ວຽກງານຈັດຊື້-ຈັດຈ້າງ, ວຽກງານການຄຸ້ມຄອງການເງິນໂຄງການ ແລະ ອື່ນໆ.
ຜ່ານການຈັດຕັ້ງປະຕິບັດໂຄງການຜ່ານມາ ເຫັນໄດ້ວ່າມີີຄວາມຄຶບໜ້າພໍ່ສົມຄວນ ຊື່ງທີ່ປະຊຸມຍັງໄດ້ຮັບຟັງການລາຍງານ ກ່ຽວກັບ ຜົນຂອງການຈັດຕັ້ງປະຕິບັດໂຄງການດັ່ງກ່າວ ພ້ອມທັງການສະເໜີກ່ຽວກັບແຜນການຕິດຕາມໂຄງການຜະລິດກະສິກຳເປັນສິນຄ້າ ຄັ້ງທີ່ 2 ໂດຍຜູ້ຕາງໜ້າຈາກທະນາຄານໂລກ.
