ໃນລະຫວ່າງວັນທີ 12-13 ມັງກອນ 2021. ຫ້ອງການປະສານງານຂັ້ນສູນກາງໄດ້ຈັດ ກອງປະຊຸມເຝິກອົບຮົມກ່ຽວກັບ ວຽກຄຸ້ມຄອງການກໍ່ສ້າງສ້ອມແປງ ແລະ ຟື້ນຟູ ໂຄງການຊົນລະປະທານ, ທີ່ໂຮງແຮມທະວີສຸກ, ເມືອງວັງວຽງ, ແຂວງວຽງຈັນ. ໂດຍການເປັນປະທານຂອງ ທ່ານ ບຸນຄ້ຳ ສີດາວົງ, ຫົວໜ້າກົມຊົນລະປະທານ, ກະຊວງກະສິກຳ ແລະ ປ່າໄມ້. ກອງປະຊຸມໃນຄັ້ງນີ້ມີຜູ້ເຂົ້າຮ່ວມທັງໝົດ 75 ຄົນໂດຍມາຈາກ ຄະນະປະສານງານໂຄງການການຂັ້ນສູນກາງ ແລະ ຂັ້ນແຂວງ, ວິຊາການດ້ານເຕັກນິກຂອງກົມຊົນລະປະທານ, ວິຊາການເຕັກນິກດ້ານຊົນລະປະທານຂັ້ນແຂວງ ແລະ ທີ່ປຶກສາໂຄງການຂັ້ນສູນກາງ. ຈຸດປະສົງຂອງກອງປະຊຸມໃນຄັ້ງນີ້ແມ່ນເພື່ອ ການຍົກລະບົບຕ່ອງໂສ້ມູນຄ່າການຜະລິດເປັນສິນຄ້າໃນເຂດເປົ້າໝາຍໂຄງການ ແລະ ກວມເອົາ 05 ແຂວງ ຄື: (1) ຄໍາມ່ວນ, (2) ບໍລິຄໍາໄຊ, (3) ນະຄອນຫລວງວຽງຈັນ, (4) ວຽງຈັນ ແລະ (5) ໄຊຍະບູລີ. ຊຶ່ງມີພື້ນທີ່ການຈັດຕັ້ງປະຕິບັດໂຄງການ ປະມານ 30,000 ຮຕ, ໃນການສົ່ງເສີມການຜະລິດກະສິກໍາເປັນສິນຄ້ານີ້ ພຶດຫຼັກໆປະກອບມີ ເຂົ້າ, ພືດຜັກ ແລະ ສາລີ, ແຂວງບໍລິຄໍາໄຊ ແລະ ຄໍມ່ວນ ແມ່ນ ເຂົ້າ, ແຂວງວຽງຈັນ ແລະ ນະຄອນຫລວງ ແມ່ນ ເຂົ້າ ແລະ ພືດຜັກ, ແຂວງ ໄຊຍະບູລີ ແມ່ນ ເຂົ້າ, ພຶດຜັກ ແລະ ສາລີ. ວຽກງານຊົນລະປະທານ ແມ່ນ ໜຶ່ງອົງປະກອບຍ່ອຍ ຂອງໂຄງການ ຊຶ່ງເອີ້ນວ່າ ອົງປະກອບ A3 ເພື່ອ ຟື້ນຟູສ້ອມແປງລະບົບຊົນລະປະທານ ຕອບສະໜອງນໍ້າຊົນລະປະທານ ໃນເຂດພື້ນທີ່ຂອງໂຄງການ ແລະ ການສ້າງຄວາມເຂັ້ມແຂງໃຫ້ແກ່ກຸ່ມນໍາໃຊ້ນໍ້າ ຊົນລະປະທານ ໃນການຄຸ້ມຄອງ ແລະ ນໍາໃຊ້ ລະບົບຊົນລະປະທານ, ຊຶ່ງມີຈໍານວນ 71 ໂຄງການ ກວມເອົາເນື້ອທີ່ ປະມານ 15.000 ຮຕ ແລະ ນໍາໃຊ້ ງົບປະມານ ຂອງ ໂຄງການ ປະມານ 5 ລ້ານໂດລາ ສະຫະລັດ ແລະ ໄດ້ແບ່ງອອກເປັນ 3 ໄລຍະ ພັດທະນາຄື :
- ໄລຍະທີ່ 1 (Batch-1A) ກວມເອົາ 6 ໂຄງການ ຊົນລະປະທານ ເປົ້າໝາຍ (ສົກປີ 2020 – 2021) ;
- ໄລຍະທີ່ 2 (Batch-1B) ກວມເອົາ21 ໂຄງການ ຊປທ ເປົ້າໝາຍ (ສົກປີ 2021 – 2022) ;
- ໄລຍະທີ່ 3 (Batch- 2) ກວມເອົາ 44 ໂຄງການ ຊປທ ເປົ້າໝາຍ (ສົກປີ 2022 – 2023).
ຊຶ່ງມາຮອດປະຈຸບັນ ໃນໄລຍະທີ 1 ໃນ 6 ໂຄງການ ຊົນລະປະທານ ແມ່ນກຳລັງໄດ້ຮັບການອະນຸມັດ ຈາກທະນາຄານໂລກ ແລະ ພວມກະກຽມ ແລະ ດຳເນີນການສ້ອມແປງ ຟື້ນຟູ. ສະນັ້ນ ມັນຈື່ງຮຽກຮ້ອງໃຫ້ມີການສ້າງຄວາມເຂັ້ມແຂງ ໃຫ້ແກ່ພະນັກງານ ຈາກຂະແໜງການທີ່ກ່ຽວຂ້ອງ ທີ່ມີໜ້າທີ່ກ່ຽວຂ້ອງກັບວຽກງານຄຸ້ມຄອງການກໍ່ສ້າງ ເຂົ້າຮັບການຝຶກອົບຮົມ ແລກປ່ຽນບົດຮຽນ ແລະ ດຳເນີນການຄຸມງານໃຫ້ເປັນໄປຕາມທິດທາງດຽວກັນ ຖຶກຕ້ອງຕາມລະບຽບການຜູ້ໃຫ້ທືນ, ສະນັ້ນ ໂຄງການ ຜະລິດກະສິກໍາເປັນສິນຄ້າ ຢູ່ ສປປ ລາວ ໃນນາມເປັນໃຈກາງ ໃນການປະສານງານຈື່ງໄດ້ຈັດຊຸດຝຶກອົບຮົມຄັ້ງນີ້ຂື້ນ.
