ກອງປະຊຸມ ເປີດການປະຕິບັດພາລະກິດການສະຫນັບສະໜຸນການຈັດຕັ້ງປະຕິບັດໂຄງການຜະລິດກະສິກຳເປັນສິນຄ້າ ຢູ່ ສປປ ລາວ ຄັ້ງທີ 4 (ຜ່ານການປະຊຸມທາງໄກ) ໃນວັນທີ 08 ມິຖຸນາ 2020, ທີ່ຫ້ອງປະຊຸມ 101 ກົມແຜນການ ແລະ ການເງິນ, ກະຊວງກະສິກຳ ແລະ ປ່າໄມ້. ໃຫ້ກຽດເປັນປະທານໂດຍ ທ່ານ ປອ. ພົມມີ ອິນທິຈັກ, ຮອງຫົວໜ້າກົມແຜນການ ແລະ ການເງິນ, ໂດຍມີຜູ້ເຂົ້າຮ່ວມຈາກບັນດາກົມວິຊາການທີ່ເປັນຈຸດປະສານງານຂອງ ກະຊວງກະສິກຳ ແລະ ປ່າໄມ້, ກະຊວງອຸດສາຫະກຳ ແລະ ການຄ້າ, ພະແນກກະສີກຳ ແລະ ປ່າໄມ້ແຂວງ, ພະແນກອຸດສາຫະກຳ ແລະ ການຄ້າແຂວງ, ທີມງານຈາກທະນາຄານໂລກ, ອົງການເນເທີແລນພັດທະນາປະຈຳລາວ (SNV), ສະຖາບັນຄົ້ນຄົ້ວເຂົ້ານາໆຊາດ (IRRI) ແລະ ຫ້ອງການຄຸ້ມຄອງໂຄງການຂັ້ນສູນກາງ.
ຈຸດປະສົງຂອງກອງປະຊຸມໃນຄັ້ງນີ້ແມ່ນເພື່ອ ລາຍງານຄວາມຄືບໜ້າໃນການຈັດຕັ້ງປະຕິບັດໂຄງການ, ປຶກສາຫາລືແລກປ່ຽນບົດຮຽນ ກ່ຽວກັບຂອດການບໍລິຫານຄຸ້ມຄອງໂຄງການ ໃນໄລຍະ 6 ເດືອນຕົ້ນປີ ແລະ ທ້າຍປີ2020, ນອກຈານັ້ນຍັງໄດ້ປຶກສາຫາລືກ່ຽວກັບ ສະພາບການຈັດຕັ້ງປະຕິບັດໂຄງການໃນໄລຍະຕົ້ນປີ 2020, ບັນດາຈຸດີ, ຈຸດອ່ອນ ແລະ ຂໍ້ຄົງຄ້າງກິດຈະກຳ ຂອງແຕ່ລະອົງປະກອບ.
ຜ່ານການຈັດຕັ້ງປະຕິບັດໂຄງການໃນໄລຍະ 6 ເດືອນຕົ້ນປີ 2020 ທາງໂຄງການແມ່ນໄດ້ມີການຈັດຕັ້ງປະຕິບັດໄປຕາມ 4 ອົງປະກອບ ຂອງ ໂຄງການ ຄື: 1). ການປັບປຸງປະສິດທິພາບ ແລະ ຄວາມຍືນຍົງໃນການເຮັດກະສິກຳ, 2). ເພີ່ມຂີດຄວາມສາມາດທາງການຄ້າຂາຍສິນຄ້າກະສິກຳ, 3) ການຄຸ້ມຄອງໂຄງການ ແລະ 4) ຄູ່ມືການຈັດຕັ້ງປະຕິບັດອົງປະກອບການຮັບມືກັບຜົນກະທົບດ້ານໄພພິບັດໃນເຂດຂອງໂຄງການ ແລະ ໄດ້ມີການສະເໜີຂໍອະນຸມັດເປີດນຳໃຊ້ອົງປະກອບດັ່ງກ່າວຜ່ານກະຊວງການເງິນ ເພື່ອສະເໜີທະນາຄານໂລກ. ສຳລັບວຽກງານແຕ່ລະອົງປະກອບໄດ້ມີການຈັດຕັ້ງປະຕິບັດ ໃນຂັ້ນສູນກາງ (ກົມ, ສະຖາບັນ ອ້ອມຂ້າງ ກະຊວງກະສິກຳ ແລະ ປ່າໄມ້ ແລະ ກະຊວງອຸດສາຫະກຳ ແລະ ການຄ້າ) ແລະ ຂັ້ນທ້ອງຖິ່ນ ເມືອງ ແລະ ແຂວງ ໃນ 5 ແຂວງເປົ້າໝາຍໂຄງການ). ໃນນັ້ນ ແມ່ນໄດ້ການຈັດຈ້າງທີ່ປຶກສາ ດ້ານການຈັດຕັ້ງປະຕິບັດໂຄງການ ໂດຍສະເພາະແມ່ນການສະໜັບສະໜຸນອົງປະກອບເຕັກນິກ ແລະ ເພື່ອອຳນວຍຄວາມສະດວກໃນການຄຸ້ມຄອງວຽກງານການປັບປຸງລະບົບຕ່ອງໂສ້ມູນຄ່າ, ສະໜັບສະໜຸນຊ່ວຍເຫຼືອໃຫ້ແກ່ ກຸ່ມຊາວກະສິກອນຜູ້ຜະລິດ ແລະ ກຸ່ມແນວພັນ ໃນການຂຽນແຜນທຸລະກິດ. ຖ່າຍທອດເຕັກນິກວິຊາການໃຫ້ແກ່ພະນັກງານຂັ້ນແຂວງ ແລະ ຂັ້ນເມືອງ ກ່ຽວກັບ ການຜະລິດເມັດພັນ, ການເຮັດກະສິກຳທີດີ, ການສ້າງຕັ້ງກຸ່ມ, ການທົດລອງອື່ນໆ ໂດຍກົມວິຊາການໃນຂັ້ນສູນກາງ, ພ້ອມກັນນັ້ນແມ່ນໄດ້ສຶບຕໍ່ ການສ້າງຄວາມອາດສາມາດໃຫ້ແຂວງເປົ້າໝາຍ ກ່ຽວກັບ ວຽກງານຈັດຊື້-ຈັດຈ້າງ, ການຄຸ້ມຄອງການເງິນໂຄງການ ແລະ ອື່ນໆ.
