ໃນລະຫວ່າງວັນທີ 06 ຫາ ວັນທີ 13 ມັງກອນ 2020 ທີ່ຜ່ານມາ. ທີມງານໂຄງການຜະລິດກະສິກຳເປັນສິນຄ້າຢູ່ ສປປ ລາວ ໄດ້ໄປທັດສະນະສຶກສາ ແລກປ່ຽນບົດຮຽນ ທີ່ ສສ ຫວຽດນາມ ກ່ຽວກັບ ການພັດທະນາລະບົບຕ່ອງໂສ້ມູນຄ່າການຜະລິດກະສິກຳ ນຳບັນດາໂຄງການ ທີ່ຕິດພັນກັບວຽກງານຜະລິດກະສິກຳເປັນສິນຄ້າຂອງຫວຽດນາມທີ່ໄດ້ຈັດຕັ້ງປະຕິດບັດຜ່ານມາ ແລະ ໂຄງການທີ່ກຳລັງຈັດຕັ້ງປະຕິບັດໃນປະຈຸບັນ. ໃນການທັດສະນະສຶກສາແລກປ່ຽນບົດຮຽນໃນຄັ້ງນີ້ ນຳທີມໂດຍ ທ່ານ ຈັນທະເນດ ສີມະຫາໂນ ຮອງຫົວໜ້າກົມແຜນການ ແລະ ການເງິນ, ກະຊວງກະສິກຳ ແລະ ປ່າໄມ້ ພ້ອມດ້ວຍຜູ້ເຂົ້າຮ່ວມຈາກ ບັນດາຜູ້ຮັບຜິດຊອບວຽກງານໂຄງການ ຈາກຂັ້ນສູນກາງ ແລະ ຂັ້ນແຂວງເຊັ່ນ: ຜູ້ຊີ້ນໍາໂຄງການຂັ້ນແຂວງ, ຜູ້ປະສານງານຂັ້ນສູນກາງ-ຂັ້ນແຂວງ, ວິຊາການຈາກກົມວິຊາການຂັ້ນສູນກາງ, ວິຊາການກະສິກຳ ແລະ ປ່າໄມ້ ແລະ ອຸດສາຫະກຳ ແລະ ການຄ້າ ຂັ້ນແຂວງ ແລະ ທິມງານທີ່ປຶກສາຈາກຫ້ອງການປະສານງານຂັ້ນສູນກາງ.
ຈຸດປະສົງໃນການທັດສະນະໃນຄັ້ງນີ້ແມ່ນ ເພື່ອແລກປ່ຽນບົດຮຽນກ່ຽວກັບການຈັດຕັ້ງການປະຕິບັດໂຄງການ, ການພັດທະນາຕ່ອງການຜະລິດກະສິກຳ, ການນໍາໃຊ້ເຕັກໂນໂລຊີໃໝ່ໆ, ກົນໄກການຜະລິດກະສິກຳ, ຂະບວນການການປຸງແຕ່ງຜະລິດຕະພັນກະສິກຳ, ການຕະຫຼາດ ຈົນເຖິງການສົ່ງອອກ ເພື່ອນຳມາໝູນໃຊ້ເຂົ້າໃນການຈັດຕັ້ງປະຕິບັດໂຄງການ ຢູ່ ສປປ ລາວ.
ໃນການໄປທັດສະນະສຶກສາ ແລະ ແລກປ່ຽນບົດຮຽນໃນຄັ້ງນີ້ ແມ່ນມີການປຶກສາຫາລືເພື່ອຖອດຖອນບົດຮຽນ ກ່ຽວກັບ ການປູກພືດຜັກ, ໝາກໄມ້ ແລະ ປູກກາເຟເປັນສິນຄ້າ ທີ່ແຂວງລຳດົງ, ການປູກເຂົ້າ ແລະ ການລ້ຽງປາ ທີ່ແຂວງເກີນເທີ່ ແລະ ພົບປະ ສູນຄົ້ນຄວ້າສາລີ ແລະ ສູນຄົ້ນຄວ້າພືດເສດຖະກິດ ທີ່ຮາໂນຍ. ຊື່ງໃນໄລຍະການໄປແລກປ່ຽນແມ່ນສາມາດຖອດຖອນບົດຮຽນໄດ້ ກ່ຽວກັບ ເຕັກນິກວິຊາການໃນການເກັບມ້ຽນຫລັງການເກັບກ່ຽວ, ລະບົບກົນໄກການຜະລິດ ແລະ ການຢັ້ງຢືນ, ການເຊື່ອມໂຍງຕະຫລາດຫາຊາວກະສິກອນ, ການບໍລິຫານຈັດການພື້ນທີ່ການຜະລິດ, ນະໂຍບາຍການສົ່ງເສີມ, ການມີສ່ວນຮ່ວມລະຫວ່າງ ລັດ, ເອກະຊົນ ແລະ ຊາວກະສິກອນ ແລະ ອື່ນໆ ທີ່ທາງໂຄງການການຈະນຳໄປຜັນຂະຫຍາຍໃນການຈັດຕັ້ງປະຕິບັດໃນໂຄງການຂອງ ສປປ ລາວ.
