ໃນວັນທີ 16 ເດືອນກໍລະກົດ ປີ 2020, ໂຄງການຜະລິດກະສິກຳເປັນສິນຄ້າ ຢູ່ ສປປ ລາວ ໄດ້ມອບອຸປະກອນຫ້ອງແລັບໃຫ້ ສູນຄົ້ນຄວ້າເຂົ້າ ແລະ ສູນຄົ້ນຄ້ວາພືດຜັກ ແລະ ໝາກໄມ້ ຂອງສະຖາບັນຄົ້ນຄວ້າກະສິກຳ, ປ່າໄມ້ ແລະ ພັດທະນາຊົນນະບົດ ເພື່ອຈັດຕັ້ງປະຕິບັດພາລະບົດບາດຂອງພວກເຂົາໃນການສົ່ງເສີມການຜະລິດແນວພັນທີ່ດີ ແລະ ມີຄຸນນະພາບ. ບັນດາສູນດັ່ງກ່າວສະໜັບສະໜູນກິດຈະກຳຕ່າງໆຂອງໂຄງການໃນການສົ່ງເສີມການຜະລິດເມັດພັນທີ່ດີ ແລະ ມີຄຸນນະພາບ. ຈຸດປະສົງໃນການນຳໃຊ້ຫ້ອງແລັບຂອງສຸນແມ່ນເພື່ອເພີ່ມຄວາມພ້ອມ ແລະ ຄວາມສາມາດ ໃນການນຳໃຊ້ແນວພັນປັບປຸງ ແລະ ເມັດພັນທີ່ມີຄຸນນະພາບສູງໂດຍສະເພາະແລ້ວແມ່ນເມັດພັນເຂົ້າ (ມັດພັນທີ່ທົນທານຕໍ່ການປ່ຽນແປງຂອງດິນຟ້າອາກາດເຊັ່ນ: ນໍ້າຖ້ວມ ແລະ ໄພແຫ້ງແລ້ງ) ໃນເຂດພື້ນທີ່ຂອງໂຄງການ.
ສະຖາບັນຄົ້ນຄວ້າກະສີກຳ, ປ່າໄມ້ ແລະ ພັດທະນາຊົນນະບົດ ມີພາລະບົດບາດໃນການຜະລິດແນວພັນເຂົ້າ ແລະ ພືດຜັກ, ໂດຍສ່ວນໃຫຍ່ແມ່ນແນວພັນປັບປຸງ ແລະ ແນວພັນພື້ນຖານ (R1) ສຳລັບການແຈກຢາຍ ແລະ ເຜີຍແຜ່ເພື່ອຜະລິດແນວພັນທີ່ຈົດທະບຽນ (R2) ແລະ ເມັດພັນທີ່ໄດ້ຮັບການຢັ້ງຢືນ (R3). ເພື່ອຮັບປະກັນແນວພັນທີ່ມີຄຸນນະພາບສູງທັງເຂົ້າ ແລະ ພືດຜັກ, ລະບົບການຜະລິດເມັດພັນຕ້ອງໄດ້ຮັບການປັບປຸງໃນທຸກລະດັບພ້ອມກັນນັບແຕ່ຂັ້ນເທິງລົງສູ່ລຸ່ມ (ກຸ່ມຜະລິດແນວພັນຊາວກະສິກອນ) ແລະ ຄາດວ່າຜົນຜະລິດ ແລະ ຄຸນນະພາບຂອງເຂົ້າຈະເພີ່ມຂື້ນ. ຖ້າຊາວກະສິກອນນຳໃຊ້ເມັດພັນທີ່ມີຄຸນນະພາບສູງ (R3) ສຳລັບການຜະລິດເຂົ້າເປຶອກ ແລະ ໃນອະນາຄົດຊາວກະສິກອນກໍ່ຈະສາມາດເພີ່ມຜົນຜະລິດເຂົ້າສານໄດ້.
